Inpaanga Thoudarwe

Kakhamnu lumik bathaiga

Hunglat lanu lungningbi

Ngaak ong aniyale

Inpaanga thoudamnu bating.

Sungmeisa khaang e.

Reipaan khat om chunbi

Kanikhat chale paanthangrio

Kakhamnu kanoi tuga.

Baning  ngaake talei tambaan

A om me nang akim bi ongbi.

Lungning dolaan bathon bathon

Intun baotaga aket thweibi

Talei kaphut gondarwe.

Nang a omme kakhanga

Bariakthin karo ga 

Intunbe inpaanga thoudarwe.

Rai dam kriangnu meiri inza

Chounghan le ngaak ngam dingdan

Raching choungkatip tam.

Chounghan han thang maaka

Mai pon kaneiga

Inpaanga thoudarwe.

 Kakhan Nu Kaan

Baning thung tang ngam maknu

Kinshanu kaan inza

Pareng saga thoudarwe.

Hoithang kungnu baluptui

Ani karo ongdam lang.

Phaangswak ro louzam saga

Bakaan henrwe ningmak o.

Intun kahan ga swak o

Kaichingnu puba nungsui zon no.

Bazaanga ringnu kapan hungtango

Nakhwan, khwang tra

Bengun baraam le bachamga.

Nagun nalwat rinrai maak o

Kraangam ga hungbi

Swannu hungmak saan

Chaatbing sung kazonga

Kutkaikarung dingo

Kraan ngamnuzo tudingo.

Banimlarwe

(Dedicated to all Inpui leaders who has gone by )

Daizaangnu mu bwan thang

Bazenu kra lwakthang

Banim larwe kin bingbi

Mibingna nakathah ding swan ong

Katoinu misa lamsekpi

Chwanpui tuthangrwe.

Kaichingnu meila tungaak

Banimlarwe zuk bathin.

Anuchaat lei thun thang

Nachwan sagana.

Natingbe ani kachaak lungningna

Baningsue.

Sikphale takaanpha,

Sangwan kathanbi 

Khatle napokbingbi

Banim larwe nating ani kachaak lungningna.

Pithangrwe ani banim maklang

Bakriang bing aishanumaadon lang.

Bachathang rwe ani sekhut lang kalei

Atiyeda chaat om aisanu sa braanbi

Nating ani sungbi lunghiak tuga hiakthang.

Ani phaap pina swak  o

Zamaak nalungning.

Anithei nang hamhung latlarwe

Anithei nating banimlarwe.

Inpaanga Thoudarwe

Kakhamnu lumik bathaiga

Hunglat lanu lungningbi

Ngaak ong aniyale

Inpaanga thoudamnu bating.

Sungmeisa khaang e.

Reipaan khat om chunbi

Kanikhat chale paanthangrio

Kakhamnu kanoi tuga.

Baning  ngaake talei tambaan

A om me nang akim bi ongbi.

Lungning dolaan bathon bathon

Intun baotaga aket thweibi

Talei kaphut gondarwe.

Nang a omme kakhanga

Bariakthin karo ga 

Intunbe inpaanga thoudarwe.

Rai dam kriangnu meiri inza

Chounghan le ngaak ngam dingdan

Raching choungkatip tam.

Chounghan han thang maaka

Mai pon kaneiga

Inpaanga thoudarwe.

 Kakhan Nu Kaan

Baning thung tang ngam maknu

Kinshanu kaan inza

Pareng saga thoudarwe.

Hoithang kungnu baluptui

Ani karo ongdam lang.

Phaangswak ro louzam saga

Bakaan henrwe ningmak o.

Intun kahan ga swak o

Kaichingnu puba nungsui zon no.

Bazaanga ringnu kapan hungtango

Nakhwan, khwang tra

Bengun baraam le bachamga.

Nagun nalwat rinrai maak o

Kraangam ga hungbi

Swannu hungmak saan

Chaatbing sung kazonga

Kutkaikarung dingo

Kraan ngamnuzo tudingo.

Centenary Nang Hungnarubo?(1914-2014)

( The Inpui Naga Baptist Churches Association has celebrated 100 years of God’s faithfulness-on Decemeber 2014 at Bakuwa Village. Tamenglong District, Manipur).

Centenary nang hungnarubo

Sangwan razanu kum naluchungbi phunga.

Taleibi mi lang kataangnu sangwan ne diye.
Nang hung tazwan kathan dan

Taraanga ongnu akatha pipemthang

Kanthang kazingnu kathikhun bina,

Kaikanei thang baanchuina sithan lampui pek.
Napaanbi ei kabaan nu murwe.

Nang inpha nina hungtang dingbo ngaaknu

Ani rangkhang langna hungnarwe.

Jesu kounu Kanthangnupa

Aniyale lengninu tuga hunglatnarwe rithoi pilang.

Centenary nang hungnu ngaak ongrwe.

Bakuwa namsa om liamtwang Maipak Namrijinang

Mi kangounu ririak e kounu lou kadouthang

Batu, bate, tutu aninun lang.

Chaat lang lampui kathan ranthang siarwe

Hakchaang lampui, kathah lampui muchaak ka.

Phaangkriang om  phaangkriang

Hungro Inpui mibing hungro

Phaangkriang om phaangkriang hunglwak ro.

Centenary rithoi potrit phunga

Bazaanga hungnarwe.

Sesam lampui semaanga

Tariang louchun taphaapnu sephaoga.
Sungrwan tunga lamchang theimaknu dan

Barangto hungna sarwe.

Luchwap ngou ngou, ngathan leiga

Kongtakuga, baraam bazaanga hungnarwe.

Kalwang kadou thang rizo hungnanu batingzo.

Centenary nang anilang chansanu phunhungo,

Asungtam me nang selat lambi

Intun nang hungnarwe karo be be.

Centenary nangzabe rithoi potrit phunchui hungo.

Ei sungtamga ngai e Centenary nang hungnarubo?

Lumik Tapek Barim Sia Ye

Louthwan sanu lumik

Ba in zon dingbarwe.

Anmu le zwang tasuk thoudarwe.

Sunpha khwazin mukdiaow,

Takaanka takhao takit,

Baphaa bingbi khumpui khumbeng.

Chenlang bi lumik kaap kaphu thang ongnu phaangmuga

Balungsia ye lumik, balungsia ye.

Ba-akle langkiana ramwan zwang baak.

Lumik bangiam ta, sungle rou ta.

Balungsia o balungsia.

Louna chaan na lampui bi,

Sikpha inta paan, inbaow paanchui e

Barhui dingle phaang ga kriange.

Sungrwantunga lumik Loktwan ramwan libi tadarwe.

Thiraangle kabinri ri,

Khwazin zingkhit khit.

Thabaan swak mak balei zingchui e.

Basana thingphobi braam be be.

Anu meimangle mikrumrum,

Naosen rwanle kadairiak thang siadarwe.

Kriange misa kum.

Inzaan, aniya, inswan tinu maak e.

Lumik tapek barim sia ye.

Intunza bakaan no ating ngaak thangri o

Ei kapaang choungza kanoithangde.

Khwazin tanarwe, khwazin tanarwe.

Takaan Kalu Zung Rwe

Takaan ka luzungrwe haba kaan

Ei achwan loihungbi

Thingna bingna chunlu

Kabun luthop luzungrwe haba kaan.

Intun mahretna ula

A-om bakaan na barapka zwang ong.

Theimak ka somninu thamlai takan darwe.

Apaiba theibo thamlai mangman ongnu naosan ding

Kabaannuna ngamle, Kazingnuna ngamle.

Sikpha zingpha hunglu zungrwe.

Eina padamnu leirik,

Eina bachun damnu rei.

Mikhatna pathang lat ting bo?

Bachup kathan kasat swakka

Swanthang ding?

Kabaan nuna ngamle, Kazingnuna ngamle

Sikpha zingpha hunglu zungrwe.

Intun lungning raangbi

Inswan rithoi balaan thei hungbi.

Pa am lungningna taleiding bachak nebo?

Takaan khwazin hungbi talei lungning kakhan ding mangabo?

Louna na babwa chan chan swaklat

Ei babwa kinsanu, Ei babwa latlanu

Aniya kadou inswan kapaang

Kakhan lang mang zungbo heiba lungning.

Lumik Ta Kapan 1

Balumsat kathan lwaklang

Bakaan not tak hungrwe.

Pupi lunglui meiri ngailang

Nampui namsom laa tulang

Tambaan chounglangna balaantanu

Chamthwan lungpekpi dong thang

Pantong inmwan bathiang nu riak.

Kachaak talei lumikta kapan

Namlanu ramwan phangsanu

''Pantong inmwan batei keithian masa''.

Kriangnu ramwan lampui bing pantong kaithang.

Louthwan sithan bingna swan ne.

Pantong kumaini (paradise) pi.

Pantong talei pom tambaan

Manglama sanu ram me.

Hungo phaango Inpui nampui sanu.

Haba nam lang sung lian nu tui lwang bo bo we.

Kasa kadai sungcham sa

Sangwan rithoi hung lou o.

Sunpha, Takaan.

Lumik swak, lumik ta

Ring nu kaphut raang thang.

Brapka hung phango

Khwasun munbi tamsaipwak pwaknu.

Barim Theimaknu Kathah

Talei tambaan kriangkale ngaak

Thale lumik In nai tubi

Nakriang namlabi ei baningam mak

Nang ongnaile ashungtam

Tui taraan nudan zongnu ga kriange.

Kriangnu choung thumnu

Swankanu babaan kashanu.

Banam shanu reipaanbi talatna laamlan laga

Karomaknu ambo?

Khwabaan swaknu tangga thabaanrei rim sanu

Bakhwaseiga barim theimaknu kathah hung mubi

Basaang tuirui nai ye.

Rakannu thirwei hungmak balei

Paanro bariak sabi

Tuipwakna tuibom sabi

Thiraang kabin hungdingo.

Tambaan dut nunle swandingo

Nakriang akriang intia thukpo diga

Kakhan dingo alungning nalungning.

  Anoh Sing Sem Bani

Anoh sing sem bani o anoh binga

Tui lwangnudan lwang swak luzungrwe.

Sendum nu noh.

Habei kahen bi kokthang ding maangbo anoh?

Habanizo ei ingai inkamni

Swanne Inpu nating kasonnu

Tasiatnu Arikrwang nakriang ga

Habani hungtang mak balei

Anoh ma lian nu

Anoh ma lian nu

Anoh bing hiak loi la

Rithoina kutbaza pek cha

Anoh bing om rithoi le pithango

Noh om nampakpi ketzaang ga

Kamaga pak ongme.

Hiakthang lat o

Ring nu choungzikpi

Nohna sipnu ei e diga

Tuipui kapaangnu tanga ga suiphaang ne.

Zingpha zingnu ma zingnu noh

Tu thiang thango thamlai ma baan nu nabaan na.

Pi inpaan no

Nohle ating

Lumikswak lumikta inpaan nudan.

Baan nwam me baan chuinu

Bathiangnu insidan.

Swan ongne arang tu zale

Katoinu lumik loiga

Paan ongnu rei saam le.

Han riangre ongme

Rithoi potrit piphunlang

Baraam zaanga hwei e

Kaithango lumik thin

Kriangnu rithoi meilana.

Nalimsabi ongbi

Riangre bi pikaro

Owthang sunpha thirwei lakpi

Kaithang mikchonu ating.

Kaithango nakriang paan na

Mikthile banuinu ram

Amdingo talei  tambaan daizaangnu

Nasung choung Bible

Baze e sachui e.

Asung choung apaap za ngaakle

Sene nalampui sene.

NB: The above poem "Anoh Singsem Bani" was published in Golden Jubilee Souvenir of Haochong Baptist Church Youth Department. 2015

 Swan Nu Laa

Kriangnu thiraang raango

Raang hungo kriangnu cham.

Khwabaan swaknu bazaangnudan

Baan ongnu lumik tamak o.

Thingna bingle ba owei mak o

Kriangnu ramsa balaangna

Lumikswak kapan lat o

Lumik ta kapan thingo

Nakriang thuk thei lang

Swan nu laa kabaang hungo

Talei tambaan lana.

Na om sakhi kachung dingo

Balumsanu sui cha ongbi.

Daan thangnu lumik pizo

Katha luthop nange.

Kapaanglanu kriangnu

Hungo kriangnu hungo.

 Thouro Mikmeng Swak Ro

Thouro mikmeng swak ro

Ngian lai lune.

Tamde dan krupnu

Nalaang bakaan lanrwe.

Anmu mik phunga

Zongrizo bazenu.

Pwan raan swan choilu

Kazingnu intaki bi chap kahit ongnu

Khwan ding khaam rizo.

Takhao takit dan braan maaklang.

Bathem rizo reibom choiluga

Thouro mikmeng swak ro

Serizo kabaan nu riakla

Thouro anu talei pimu thangrizo

Talei maigon bingbi

Thouro mikmeng swak ro.

Alampui

Ring ongnu zwe

Rwan chaang.

Ket man ga seswak ngam mak

Thei ga theiga mikchonu

Se ongme haba lampui.

Tu ongnu laa kaba le theimak

Baan cham banimnu

Ring ringa thinu

Sega sega lwaam nu

Heirwe alampui.

Talei ba am, krwang na maak

Choungsem choungtan naosen kutpi

Minamnu ding bakutzung lanbi pilaam me.

Dandi na kama choungsemna banungsui.

Meila am, meibom maak

Taraan ga ongbi tuipwak phun nu

Lampui kathan ran thang,

Sethang lang mimaak

Kakhambi apum zwanga

Lunglang zungbo?

        

    

To A Friend

To a friend, from a friend

 (Dedicated to Late Punusa Rhakho who died due to kidney failure in 2012)

Time goes, so fast, we met; we depart

With best memories left behind missed.

Life ask so much, no wonder friends get out of touch

And slowly seems to fade away

Until rekindle with a long lost hug.

Memories will last till long gone.

You came and passed away too soon.

Things undone, remind us we are here for a while.

Yet you took life as it is and went

Alone unnoticed. 

Every little moment passes

And we cannot hold them back.

When you close your eyes

Enjoy again those sweet memories spent

And wake up to a new day free as a bird.

Maybe you outlived, maybe you have won the race.

Or when you write “where is that world?

I wonder if its exist at all, where my life wasn’t such a stranger to me.”

Maybe you need an open space.

Fly, fly, buddy fly.

Life they say is touch and go.

Some people we knew may only be there for a while.

Yet you have touched our heart.

Very far yet so near.

Keep awake with you your dreamy

Eyes never fading.

It is painful to smile when you are hurting inside.

But still it’s worth the fight.

You hide the thousand emotions.

We were fooled by the happiest face,

Masking the most hurting heart.

Like a fairytale gone wrong,

Or just a country song by the willow.

Our world was a happy place until you decide,

Pack and leave.

In the sweet bye and bye.

Life after you goes.

If it is to be, hope to see you again

If friendship never ends.

Written By Isaac Inkah for late Punusha Rhakho who passed away due to kidney failure.

Intun Ui Lousa Ui

Intun ui lousa ui

A ui tumak rwan ui tu

Amei thaanbi kathou nou nou

Aman mumaakpi

Kamei rwakungma basaang

Eina koubi kachiri ri

Akhwan theimakpi inkhun lan kairai.

Intun ui lousa ui

Zanru amle kamai

Zanru makle kamai

Insaak inthweiza

Kasung ngong ngong

Theilanrwe intun ui

Bakatha ding kasung nu zungrwe.

Ui busun inthang lanu

Babutheng rwan butheng

Baliak zalu sia.

Intun ui lousa ui

Toxana bathou tuchaak la

Inmai indop, insak inthwei

 Bazunun tazwan kathah khwang laak ong.

Ringnu ui thinu takhuma saye dinu

Inzaan meiri zungrwe.

 Intun ui lousa ui

A om ngouraang

Anin ring khaan

In nai kasen lu

Leikai huirak

Hungo zanru sat thang e.

Intun ui lousa ui

Mang mang nu ui mi ei basiat nu.

Intun ui kachap ngai laye

Pa am chounglaa kakungnu

Minam mikainu amgabo?

Sennun na banui

Thamlai aanpuina kadaak kadaak

Ui nun na kasungbi.

Loubuk sen nun ba in kadarwe.

A ui thabaan thweibi mangmang ongme.

Thamlai ui kachap, khwanzin uinun kachap

Balang kamaknu kachap

Ui kapanzai bi buheibi

Talei karaan rinchaak nu

Haga lanrwe

Intun ui lousa ui

Kamah ringkhan

Intia sanu,

Intun ui Lousa ui.

  Chamthuan

Eina bathan thang damnu chamthuan

Hanhunglatro kriangnu cham ngaak ka ongbi

Intia thuknu sung choung amgabo?

Bacham phun hungam lanu.

Kriangnu chethan phun chui hungo

Apa in ongbi, Anu laa to ongbi

Inkam ga hungo anao indop tuikhunla

Tuila sedamnu tanza phaanga.

Kriangnu bapao tuila nudan la hungo

Chamthuan bi “ei na om me di phungo”.

Ei balang ring ongbi.

Kriangnu chethan nathoubi sungkhut o

Asung choung phun kabaab mak o

Akut kasiang bi kathah dan

Lumsanu cham thuan mi tu o.

Mang dolaan twang mak o

Naraangtu bazaanga seyo

Zingpha thabaan sanu man phunga

Taraannu sung kathah pisu lat o

Maangsa maan ongbi

Louthuan lumik swak makbalei

Rinthango bakhouza

Na om thiamzeiba nacham ngak ngam laga ong.

Zwang hungo zwang hungo

Talatna reipaan bingbi

Laam brik ongbi.

Pitaraan no ataraan dan

Banem nu nalaana

Hanhunglat o bataru tapon phunga.

Reisa

Inpui Reisa nang rangaknu

Amangla  sianpui

Talei bi baodam nu lungsom

Nangbe talei kraan phun hung mak o

Thaan kom lily tamang zwe

Reisa  namei thaan bi

Bazin se nu inzana losak e

Kanithin bakim bi ong nwam me

Seswak mak o nang tui pwak paan bina

Napaan sa ongbi

Asungle paan dingo

Kwat thangde anqwat kathan

Paan no reisa taliat tamaknu rambi

Paan no louthwan danga paan no

Bathot sianu thiraang maknu tuina la

Paan no tuipwakla tuipwak rei tuga paano.

  Kazingnu Balao Sat O

Ngai o ngai kaat ongnu

Namei thaanbi hanga

Rinne nani mibing khou

Ngai o ngai kaatnu

Nalaangna rin ongnu.

Sero aniya namlanu

Pak o paoga karoga

Phaango phaangsanu ram

Phaango phaaangsanu rei

Ongo banamsanu banambi.

Ngai o laa kasanu bing

Suitu o nangle laazaam .

Paa o insi single

Thabaan sa ongbi.

Kasam mo inlu inten

Kasammo, kasamga

Kazingnu balao sat o.