INBEI INBEI. INCHANG INCHANG

Inbei, inbei. Inchang, inchang.

Inbeila selang mu, inchangla selangbo?

Laampui maanga ingai kaamthangni

Kasakla hunglangmu, kathweila talangbo?

Onglangmu?  Selangbo?

Sunpha kasia ba thoudarwe.

Sikpha butaangnu kadou ding?

Phaanglo misa tangem thouna,

Bani bongkhon kaisip thang ongsarwe.

Bathou thanglat ro anu,

In ongnu kathah ding.

Lumikle Loktwan lila tadingbarwe.

Inchan ani mikphaap swak mak ongni?

Kekho deta ga kalumme;

Anu nabalumhsat cho inchanbo?

Rinthang ngo aniya bakaan sabi

Apu inpui inteng baonu mangman ne.

Rwan , rwan gonthou loidarwe.

Ani, ani heizaza!

Sunkazon nu manle pimuthango

Ei hweiye achaat Inpui ding krianga.

Sangwan razana intone?

Sangwan rachingna intone?

Rakhanu sangwan le hungdamzwe.

Apu chemzap, apa kehiak mumak ka

Anu nakehiak sui kadimga hungnaye.

Anungla hungnu maanbe anu aisia chaplune.

Lungning lianthou, sungle lianthou

Ani chunle baanswak, kasanuna

Lumikswak lumikta hung.

Bakuwa lungkhon , Lwanzaang kapan be ambasia dam rwe.

Manukwa, tuipuikwa na nangthou darwe sui hweithang ding?

Into zodi anu wo asung riangre ye

Sungsa nu meila bachoi thango.

Zongminnu leithwan balaan thango

Kabaannu takan khut mak balei

Ningting raan katwak ngam ga lungo rithoi yo.

Anu nang talei laza phanglu

Sangbaan kalaak pantwan lune.

Apa nang sangbaan za phaanglu

Talei khun doulune.

Lungpui bi inkam langle maak

Bakaanzuba loi hung narwe di.

Sangwan heiza, mising heiza di’

Basing sem ongmang bo?

Ringnu ringzoklang ringnu,

Patso meiri ngaiga talei thot sia khit khit.

Jisu ba hungnong lu zungrwa

Ani balumsat na ramwan raan khat la.

Inchang, inchang, inbei inbei!

Ingai selang theimak lungning kabaap ongbi

Rwan ula kadambi

Ani cham ani ket kai kale zodi.

Puithangnu Pa hungrwe

Rithoi saangkra lwakrizo

Zingnu na hwamlem hungmak balei

He anu Inpui.

Free Translation
"Left left, Right right
where should i go
Left or Right?
Should  i go up, or down?
Should i sit down or walk?"

NB: This poem was published in Kala-Khwanbaang, an annual magazine of Inpui Students' Union, Delhi. 2014

IN SEARCH OF A READER

Hiakthangnu bahiak,

Bathuk amnu chongkaang.

Buktanu mu dan

Mikhat nale theimak le

Mong lamzwe kanikhat.

Kasanu bwan nukra

Sasu nonge ning mak.

Hiakthangnu chounglaa

Hiakthangnu bahiak

Ngaak e pathangnu,

Ngaak e pa thanglang.

Nisat sabi naosen nilim bi karo nudan

Thamlai thingpho sabi basa karo nudan

Khatle khwakaangbi khwasun nudan.

Pathango nu hiak,

Raithango pa meiri.

Intun makle inswan,

Inswan makle tipni.

Anikum makle kumthang.

Pathango heiba hiak;

Phangthango heiba chounglaa.

Choungzik sanu ame rin mak e.

Kanunglangle rin basaam thang mak e.

Pathang zalang za lamphaange

Chouk tamdingo tamphoi meimaan nudan.

Pathango pahiak,

Raithango nu meiri.

Balumsat

Bani rinne nang ringnu;

Nang zana kaithangne

Mikna mumaknu tambaan.

Noh lei phun ngaakle kokthangne bakeh bi talutabi.

Balumsat nang tambaan le talei barui bazem.

Kaithango mina rinnu,

Rintangam mak e nuriak cho.

Loh sak mak sui hung naye tambaan nai hungo.

Lat thango  rithoi inkhaan

Khop maknu  alaangle.

Phaangta thango taraanga se ongnu kathah;

Pithanglat o pangkan kathan.

Balumsat, o nang ringriak lampui.

Riangre lak ka hung naye

Kadou thango kathah.

Free Translation

Faith

"They say you are life

You only lead to the place where eyes cannot see.

the debt of sin will be forgiven at his feet.

Faith you are the highway to heaven".

Zingpha Sanu

Thamlai lumik tadarwe

Khwazin le zingpha mun bi

Khumpui khumbeng na bani kapaangla towe.

Lumik baan sa ongbi abaan rwan  kriangnu le

Bachamlu karo lanlanu

Zingpha aria baloi dingbi

Bani ding baningsuga losia ye.

Aniya zingpha mang man mak balei

Kakhan ne intia sabo batak nu kum.

Manglama sanu kumding

Thougoi maknu

Ni’ kapangnu misa.

Zingpha inkhaansa latka phaangswak,

Sambaan la insi raching

Baan chan chan ongme.

Kriang nge bakaan sanu.

Kazingnu takanlu inswan

Louthwan khwabaan amme baning mak e.

Zingpha sambaan la phaangga karo ye

Takhao takit khwansanu le

Zingpha tapon ne.

Tha le insina hei talei baanchang thang

Khwadweinu hungle

Aniya lumik,

Thathit ngakle

Aniya tha than ding baning ga

Ei be karo ongdam rwe.

Anu Saangmaikra

Anu louchwan tunu miye

Anu alaang saangmaikra linge.

Saangmaikra kaesinu, saangmaikra katoinu.

Saangmaikra batungnu, kabaangnu bachaat bing.

Anu sung saangmaikra banemnu numa saye.

Eina saangkung lakpi
Anu saangmaikra ba annu railang khut pi

Basa nun balaoga zwang thoudarwe.

Anu baluptui taga tachi ta' nu intun be

Bakra lwat hung ding barwe.

Anu maret bing bi kra ong rwe.

Bachup raza le swak na rwe.

Anu lounom lale amai kabop.

Anu louzai saangkung na hai rip rip ka.

Anu nating swan ne.

Anu saangmaikra kra ongrwe.

Anu saangmaikra kra ongrwe.

Anu Insaang Thou Ong Rwe

Anu insaang thou ong rwe.

Louthwan  thiraangnale

Inmai bi louna raangta thang siarwe.

Innai aankhong khwansale khwang ongrwe.

Lumikle kanarwe

Louthwan kadowle braan darwe.

Indwan khouring bingle

Anu kom sui zon zui zui ongrwe.

Bokpui thaisalang balaoga pak hung narwe.

Aan nunle na tasaidi bunnnu salangna zwanghungnarwe.

Chaksangla butheng bukta nu braam ngaisurwe.

Anao na inrut ongrwe

A-uh saangsu ongrwe.

Apina kaphin choilu a om taalathu kasuiga

Barangto tutu rai ongrwe.

Louthwan innaile taleng hung ongrwe.

Apu na thing inbi chemthwang ong rwe.

Apa na loula talang chamdaan ongrwe.

Anu na insaang thouro diga chamthwan khutnu anao na

A om inkhaan bachu ga ating khut bathou ongrwe.

Inpui youth in their traditional  with the writer's mother standing far left flanked by an anut to her left@Isaac Inkah

Akatha Laa Tuthou Narwe

In ong nu katha

Aniya pa am lungning swak po?

Karo dou ga thou nabazo!

Tambaan inkhaan le lat swak narwe

Inpuh Rikrwang om lan le muding barwe.

Ei aniya kabaan nu murwe.

 Ei aniya bazenu murwe.

Ei aniya ringnu lourwe.

Tambaan om bapuba na

He misa hungro kou ongnu

Aniya akana sana ngaisulu

Asungbi limthangrwe.

Tambu zingnu takan lu

Tambaan kalaak karwe.

Khwang, tra

Bengun, siantwei, sianbung choithou lu swan no akatha.

Akatha laa tu thou narwe!

Kachaak kumbi ei inpuh lwat cho lung indao ne.

Swankarwe Inpuh ei bazenu kadourwe.

Asungbi, alungning bi dai bazaang nu

Thiraang kabin hung ongrwe.

Ring lang zungrwe bakhwasei ga.

Tambaan kanglaak ongrwe.

Riangre balupswak ka chapnu

Phaangkriang Inpuh na tasiat nu ngam om ngam phunga

Pimut satne diye.

Akatha laa tu thounarwe

Sangwan inza inza poibraan selu.

Free Translation

What awake the sleeping soul?

My soul has began to sing

The gates of heaven is open 

And the wealth of God is to be seen.

I saw the light today

I saw righteousness today".

Lumik Swaknudan Asung

Lumik swaknudan asung

Kathan than’ thourwe,

Louthwan nale balaa tuthourwe.

Nu meimang kombi naosen le bamang rai ong rwe.

Inmwan raankaan nale

Inmwan kapan bi hanlu

Bri tanu ngaak ka balaa pao ong rwe.

Aankhong khwansa bagale khwang chuidou ongrwe.

Zingpha ramwan lanla baanchui ongnu gale

Louthwan khwa baan swakka ba in baloi darwe.

Reipaan nale khweibwan hungnu ngaak ongrwe

Lumik swaknarwe anu chwan kahou latlang

He bakhwa, nalumik sa yo

Anu thou ding got thangmak o

Muliang pang phun hung dingo.

Freedom

Ningthungrwe babwa ei.

Anu pam bathan ga,

Rwan talei om dolaan kamang bi tanga.

Kama apuna ula ye dinu

Apana muga ei setangrwe.

Ningthungrwe aniya ei anupam bina namlaga

Inkhun khatle achaat mengbi seswakka.

Mibing balumsat potrit phunlu bazwan taram kasabi

Onglu Inpui ramwan zo inlam zungrubo?

Ning thungrwe eibe thiraang kabin thangmaknu riakla onglu.

Misen bi mutang maknu man phunlu

Ala swakle arang, ala khutle arang.

Siantui na inmwanzai thingkung bi kra ongnu dan,

Nupa baluptui manzo ei nungainu garwe.

Phaangmurwe rwan na munu,

Sasu rwe rwan na sanu thaisaak

Inthangrwe rwan na innu.

Rwannu busun ding antiamga????

Ei ningnu thungrwe.

Ei be ningthungrwe.

Nupa theitang maknu riakla onglu eibe karo rwe.

Nupa baluptui pa ambo?

Nupa sianlan ingai bo?

Sanwam sa, in nwam in.

Babwa tibazo heirwada.

Lung owei zanu kum kalo ga lung mak-e be

Pa am bahao bo abaan zaang rwan?

Laarui suinu telanga

Talei thiraang natdom hungda baraangtu zwang thou darwe.

Nu’na kanoithangnu choungle

Kana bina braan khit khit.

Pa’, pa’, nu’, nu’ ula namlanu lawai ramla.

Nupa choung takan nu

Inmai pokron kachaak takan numa baiye.

Anu naba ei hungbi diga

Khouring dwan dan kheng.

Baan, pai na tambi, eina ya zamak e.

Anu thi, apa thi ongrwe

Rwamramla nasa eina raiga tuthat rwe.

Nu’ mai, pa’ mai kaika ngam makka aan inkam to.

Nungairwe eibe rwan ramla selu nungairwe.

Anu sungriangrek balan zwe.

Ei ring ong harwa da.

Apa pangkan intia nat ongbi ei karomak inpha karoni!

Sanrwan damding rwe na-in saga

Rwandop cha kadomlu.

Mimakmai bacham maknu ding baan tolu.

Rwansa ba tuipui kachak takan darwe.

Phaango babaan rwan ba tuiraan kadarwe.

Ei anu aisia losia chapthi.

Mutlanu mei chok ongrwe

Raanglan lanu thiraang karek hungnarwe.

Anu kachaap raching kra zo maisianu potraat tuga anu pam bi

Bazwan pok pok thang.

Anu wo nalei chaak,

Apa wo nalei thun ngam larwe.

(A sincere dedication to all the Inpui youth living  far from a place called home. It’s just my view and no offence intended whatsoever).

Inpaanga Thoudarwe

Kakhamnu lumik bathaiga

Hunglat lanu lungningbi

Ngaak ong aniyale

Inpaanga thoudamnu bating.

Sungmeisa khaang e.

Reipaan khat om chunbi

Kanikhat chale paanthangrio

Kakhamnu kanoi tuga.

Baning  ngaake talei tambaan

A om me nang akim bi ongbi.

Lungning dolaan bathon bathon

Intun baotaga aket thweibi

Talei kaphut gondarwe.

Nang a omme kakhanga

Bariakthin karo ga 

Intunbe inpaanga thoudarwe.

Rai dam kriangnu meiri inza

Chounghan le ngaak ngam dingdan

Raching choungkatip tam.

Chounghan han thang maaka

Mai pon kaneiga

Inpaanga thoudarwe.

 Kakhan Nu Kaan

Baning thung tang ngam maknu

Kinshanu kaan inza

Pareng saga thoudarwe.

Hoithang kungnu baluptui

Ani karo ongdam lang.

Phaangswak ro louzam saga

Bakaan henrwe ningmak o.

Intun kahan ga swak o

Kaichingnu puba nungsui zon no.

Bazaanga ringnu kapan hungtango

Nakhwan, khwang tra

Bengun baraam le bachamga.

Nagun nalwat rinrai maak o

Kraangam ga hungbi

Swannu hungmak saan

Chaatbing sung kazonga

Kutkaikarung dingo

Kraan ngamnuzo tudingo.

Banimlarwe

(Dedicated to all Inpui leaders who has gone by )

Daizaangnu mu bwan thang

Bazenu kra lwakthang

Banim larwe kin bingbi

Mibingna nakathah ding swan ong

Katoinu misa lamsekpi

Chwanpui tuthangrwe.

Kaichingnu meila tungaak

Banimlarwe zuk bathin.

Anuchaat lei thun thang

Nachwan sagana.

Natingbe ani kachaak lungningna

Baningsue.

Sikphale takaanpha,

Sangwan kathanbi 

Khatle napokbingbi

Banim larwe nating ani kachaak lungningna.

Pithangrwe ani banim maklang

Bakriang bing aishanumaadon lang.

Bachathang rwe ani sekhut lang kalei

Atiyeda chaat om aisanu sa braanbi

Nating ani sungbi lunghiak tuga hiakthang.

Ani phaap pina swak  o

Zamaak nalungning.

Anithei nang hamhung latlarwe

Anithei nating banimlarwe.

Inpaanga Thoudarwe

Kakhamnu lumik bathaiga

Hunglat lanu lungningbi

Ngaak ong aniyale

Inpaanga thoudamnu bating.

Sungmeisa khaang e.

Reipaan khat om chunbi

Kanikhat chale paanthangrio

Kakhamnu kanoi tuga.

Baning  ngaake talei tambaan

A om me nang akim bi ongbi.

Lungning dolaan bathon bathon

Intun baotaga aket thweibi

Talei kaphut gondarwe.

Nang a omme kakhanga

Bariakthin karo ga 

Intunbe inpaanga thoudarwe.

Rai dam kriangnu meiri inza

Chounghan le ngaak ngam dingdan

Raching choungkatip tam.

Chounghan han thang maaka

Mai pon kaneiga

Inpaanga thoudarwe.

 Kakhan Nu Kaan

Baning thung tang ngam maknu

Kinshanu kaan inza

Pareng saga thoudarwe.

Hoithang kungnu baluptui

Ani karo ongdam lang.

Phaangswak ro louzam saga

Bakaan henrwe ningmak o.

Intun kahan ga swak o

Kaichingnu puba nungsui zon no.

Bazaanga ringnu kapan hungtango

Nakhwan, khwang tra

Bengun baraam le bachamga.

Nagun nalwat rinrai maak o

Kraangam ga hungbi

Swannu hungmak saan

Chaatbing sung kazonga

Kutkaikarung dingo

Kraan ngamnuzo tudingo.

Centenary Nang Hungnarubo?(1914-2014)

( The Inpui Naga Baptist Churches Association has celebrated 100 years of God’s faithfulness-on Decemeber 2014 at Bakuwa Village. Tamenglong District, Manipur).

Centenary nang hungnarubo

Sangwan razanu kum naluchungbi phunga.

Taleibi mi lang kataangnu sangwan ne diye.
Nang hung tazwan kathan dan

Taraanga ongnu akatha pipemthang

Kanthang kazingnu kathikhun bina,

Kaikanei thang baanchuina sithan lampui pek.
Napaanbi ei kabaan nu murwe.

Nang inpha nina hungtang dingbo ngaaknu

Ani rangkhang langna hungnarwe.

Jesu kounu Kanthangnupa

Aniyale lengninu tuga hunglatnarwe rithoi pilang.

Centenary nang hungnu ngaak ongrwe.

Bakuwa namsa om liamtwang Maipak Namrijinang

Mi kangounu ririak e kounu lou kadouthang

Batu, bate, tutu aninun lang.

Chaat lang lampui kathan ranthang siarwe

Hakchaang lampui, kathah lampui muchaak ka.

Phaangkriang om  phaangkriang

Hungro Inpui mibing hungro

Phaangkriang om phaangkriang hunglwak ro.

Centenary rithoi potrit phunga

Bazaanga hungnarwe.

Sesam lampui semaanga

Tariang louchun taphaapnu sephaoga.
Sungrwan tunga lamchang theimaknu dan

Barangto hungna sarwe.

Luchwap ngou ngou, ngathan leiga

Kongtakuga, baraam bazaanga hungnarwe.

Kalwang kadou thang rizo hungnanu batingzo.

Centenary nang anilang chansanu phunhungo,

Asungtam me nang selat lambi

Intun nang hungnarwe karo be be.

Centenary nangzabe rithoi potrit phunchui hungo.

Ei sungtamga ngai e Centenary nang hungnarubo?

Lumik Tapek Barim Sia Ye

Louthwan sanu lumik

Ba in zon dingbarwe.

Anmu le zwang tasuk thoudarwe.

Sunpha khwazin mukdiaow,

Takaanka takhao takit,

Baphaa bingbi khumpui khumbeng.

Chenlang bi lumik kaap kaphu thang ongnu phaangmuga

Balungsia ye lumik, balungsia ye.

Ba-akle langkiana ramwan zwang baak.

Lumik bangiam ta, sungle rou ta.

Balungsia o balungsia.

Louna chaan na lampui bi,

Sikpha inta paan, inbaow paanchui e

Barhui dingle phaang ga kriange.

Sungrwantunga lumik Loktwan ramwan libi tadarwe.

Thiraangle kabinri ri,

Khwazin zingkhit khit.

Thabaan swak mak balei zingchui e.

Basana thingphobi braam be be.

Anu meimangle mikrumrum,

Naosen rwanle kadairiak thang siadarwe.

Kriange misa kum.

Inzaan, aniya, inswan tinu maak e.

Lumik tapek barim sia ye.

Intunza bakaan no ating ngaak thangri o

Ei kapaang choungza kanoithangde.

Khwazin tanarwe, khwazin tanarwe.

Takaan Kalu Zung Rwe

Takaan ka luzungrwe haba kaan

Ei achwan loihungbi

Thingna bingna chunlu

Kabun luthop luzungrwe haba kaan.

Intun mahretna ula

A-om bakaan na barapka zwang ong.

Theimak ka somninu thamlai takan darwe.

Apaiba theibo thamlai mangman ongnu naosan ding

Kabaannuna ngamle, Kazingnuna ngamle.

Sikpha zingpha hunglu zungrwe.

Eina padamnu leirik,

Eina bachun damnu rei.

Mikhatna pathang lat ting bo?

Bachup kathan kasat swakka

Swanthang ding?

Kabaan nuna ngamle, Kazingnuna ngamle

Sikpha zingpha hunglu zungrwe.

Intun lungning raangbi

Inswan rithoi balaan thei hungbi.

Pa am lungningna taleiding bachak nebo?

Takaan khwazin hungbi talei lungning kakhan ding mangabo?

Louna na babwa chan chan swaklat

Ei babwa kinsanu, Ei babwa latlanu

Aniya kadou inswan kapaang

Kakhan lang mang zungbo heiba lungning.

Lumik Ta Kapan 1

Balumsat kathan lwaklang

Bakaan not tak hungrwe.

Pupi lunglui meiri ngailang

Nampui namsom laa tulang

Tambaan chounglangna balaantanu

Chamthwan lungpekpi dong thang

Pantong inmwan bathiang nu riak.

Kachaak talei lumikta kapan

Namlanu ramwan phangsanu

''Pantong inmwan batei keithian masa''.

Kriangnu ramwan lampui bing pantong kaithang.

Louthwan sithan bingna swan ne.

Pantong kumaini (paradise) pi.

Pantong talei pom tambaan

Manglama sanu ram me.

Hungo phaango Inpui nampui sanu.

Haba nam lang sung lian nu tui lwang bo bo we.

Kasa kadai sungcham sa

Sangwan rithoi hung lou o.

Sunpha, Takaan.

Lumik swak, lumik ta

Ring nu kaphut raang thang.

Brapka hung phango

Khwasun munbi tamsaipwak pwaknu.

Barim Theimaknu Kathah

Talei tambaan kriangkale ngaak

Thale lumik In nai tubi

Nakriang namlabi ei baningam mak

Nang ongnaile ashungtam

Tui taraan nudan zongnu ga kriange.

Kriangnu choung thumnu

Swankanu babaan kashanu.

Banam shanu reipaanbi talatna laamlan laga

Karomaknu ambo?

Khwabaan swaknu tangga thabaanrei rim sanu

Bakhwaseiga barim theimaknu kathah hung mubi

Basaang tuirui nai ye.

Rakannu thirwei hungmak balei

Paanro bariak sabi

Tuipwakna tuibom sabi

Thiraang kabin hungdingo.

Tambaan dut nunle swandingo

Nakriang akriang intia thukpo diga

Kakhan dingo alungning nalungning.

  Anoh Sing Sem Bani

Anoh sing sem bani o anoh binga

Tui lwangnudan lwang swak luzungrwe.

Sendum nu noh.

Habei kahen bi kokthang ding maangbo anoh?

Habanizo ei ingai inkamni

Swanne Inpu nating kasonnu

Tasiatnu Arikrwang nakriang ga

Habani hungtang mak balei

Anoh ma lian nu

Anoh ma lian nu

Anoh bing hiak loi la

Rithoina kutbaza pek cha

Anoh bing om rithoi le pithango

Noh om nampakpi ketzaang ga

Kamaga pak ongme.

Hiakthang lat o

Ring nu choungzikpi

Nohna sipnu ei e diga

Tuipui kapaangnu tanga ga suiphaang ne.

Zingpha zingnu ma zingnu noh

Tu thiang thango thamlai ma baan nu nabaan na.

Pi inpaan no

Nohle ating

Lumikswak lumikta inpaan nudan.

Baan nwam me baan chuinu

Bathiangnu insidan.

Swan ongne arang tu zale

Katoinu lumik loiga

Paan ongnu rei saam le.

Han riangre ongme

Rithoi potrit piphunlang

Baraam zaanga hwei e

Kaithango lumik thin

Kriangnu rithoi meilana.

Nalimsabi ongbi

Riangre bi pikaro

Owthang sunpha thirwei lakpi

Kaithang mikchonu ating.

Kaithango nakriang paan na

Mikthile banuinu ram

Amdingo talei  tambaan daizaangnu

Nasung choung Bible

Baze e sachui e.

Asung choung apaap za ngaakle

Sene nalampui sene.

NB: The above poem "Anoh Singsem Bani" was published in Golden Jubilee Souvenir of Haochong Baptist Church Youth Department. 2015

 Swan Nu Laa

Kriangnu thiraang raango

Raang hungo kriangnu cham.

Khwabaan swaknu bazaangnudan

Baan ongnu lumik tamak o.

Thingna bingle ba owei mak o

Kriangnu ramsa balaangna

Lumikswak kapan lat o

Lumik ta kapan thingo

Nakriang thuk thei lang

Swan nu laa kabaang hungo

Talei tambaan lana.

Na om sakhi kachung dingo

Balumsanu sui cha ongbi.

Daan thangnu lumik pizo

Katha luthop nange.

Kapaanglanu kriangnu

Hungo kriangnu hungo.

 Thouro Mikmeng Swak Ro

Thouro mikmeng swak ro

Ngian lai lune.

Tamde dan krupnu

Nalaang bakaan lanrwe.

Anmu mik phunga

Zongrizo bazenu.

Pwan raan swan choilu

Kazingnu intaki bi chap kahit ongnu

Khwan ding khaam rizo.

Takhao takit dan braan maaklang.

Bathem rizo reibom choiluga

Thouro mikmeng swak ro

Serizo kabaan nu riakla

Thouro anu talei pimu thangrizo

Talei maigon bingbi

Thouro mikmeng swak ro.

Alampui

Ring ongnu zwe

Rwan chaang.

Ket man ga seswak ngam mak

Thei ga theiga mikchonu

Se ongme haba lampui.

Tu ongnu laa kaba le theimak

Baan cham banimnu

Ring ringa thinu

Sega sega lwaam nu

Heirwe alampui.

Talei ba am, krwang na maak

Choungsem choungtan naosen kutpi

Minamnu ding bakutzung lanbi pilaam me.

Dandi na kama choungsemna banungsui.

Meila am, meibom maak

Taraan ga ongbi tuipwak phun nu

Lampui kathan ran thang,

Sethang lang mimaak

Kakhambi apum zwanga

Lunglang zungbo?