Inzaanza bachup kadoi ongnu
Reipho aniya bi paan
Kaphuga paan ongrwe.
Basaangnu thingkung bi,
Barwannu thingpho bi.
Lungning thungnu kaane
Louse riangre hungnu lang pang kan son thang.
Misa khei kachiga namlanu riakla
Kamong tipnu manpa na rang kaanne.
Nalu chungbi basana hanga laasa takhem me.
Khweibingna bwan bo bo.
Narimsanu ula tanga
Babwasa sung inza pithou e.
Thingpho reipho sanu
Reipho thingpho sanu.
Basana zwang baak ong saan paan thangbi o.
Balaa pemga tudam dingo.
Nangba eina choi tang lanu riakla
Amikpi tapon ne, Sadinge, Sanu rei rim.
Naraangkaan thingpuibi paanlu
Nanithunga paan ongnu
Thingpho sabi paan ongnu reisat.
Kamanu Khwan
Apaiba na-om thaomeiga
Pithango aniya zingpha ja
Pithango abaang zaang hunglan rwe.
Sunmun om khumpui khumbeng baraam ngaide.
Kasanu louthwanbi
Ngaisu ding bo kwan inbi misa,
Swan dingbo thinraakpi basa.
Abaanno na om thao meiga
Pithango aniya zingpha za.
Thabaan nangmakpi insi bing losia e.
Alampui bingle barim sia ye.
Louthwan khwa baan laa ngai nang lang
Chok ongnu thaomeigale chokloi hungrwe.
Taan saango thaomei kadwan bing
Taanno ramwan basaangnu bi.
Loulwak Tha
Ei seye araangtu
Kakoinu lampui
Rithoipuba khouna namlaga
Seye namlaga rithoi puba khouna
Kabaannu ramret takanga
Achoung tam thoubi ei theirwe
Apaap namla lanrwe.
Tambaan taleina kedkhok
detabi
Loulwak kaan hunglurwe
Rithoi luthop alaang suiding bo?
Intun Bakaan Rwe
Lingthangnu kaan
Bathou thangnu kaan
Kachui thangnu kaan
Kaiching thangnu kaan
Khom kadoinu kaan
Karo thounu sangwan
Laa kathan laam kathan kachamga
Kahou thoubi
Kutsamga karaan khaamnu
Khatle ringriak zongnu
Intun bakaan rwe.
Nalaangna
Sero banui zum zum
Inpuhpa in pek kaneiga
Kachaak mikthi lwang dingo
Bachunnu manpa inla sebi
Kazingnu sambaan lat thang dingo.
Choungren tamsaipwak pwak tingo.
Bachan sanu rei, aisanu rei.
Sero banui zum zum
Karo ketkaam kaamga.
Sungphunnu tuthang lanro kamah kanaak kalatka
Sero kum lampui karo karoga
Kokthang, banim thang siayo ani koi
Heirwe kum lampui baningthango.
Karo aisa nukum tu o
Sero banui zum zum
Inpupa in pek kaneiga.
Khwasun
no 1
Khwasunno suntaro
Kaphutna sipnu taleibi
Kaphut lampui tu thiang lang
Sunro, khwasun suntaro
Lumik natnu thweibi chaangthiga
Bazinse ongnu manpa khou pimu o
Balampui kasanu
Chaan ongnu reipaan pi bakat ringlat o
Suntaro khwasun no suntaro
Thingna louna pi bakat ring latka
Pibwan bo bo o khweibing reipui ankwat pi.
Kamong pita lat o thingkungbing.
Anucham
Ula ramuan lan la
Anu lungsanu sung ame.
Ating ponthangnu ramla
Reipaan binga paan ongakrwe
Khumpui kumbeng baraam kriangnu
Anu nangle paanlat o habing lakpi
Babing theiye anuram namlala
Louthwan khwazin
Lumikswak lumikta
Anukhwan theinwam inku e
Rwanramla onglu anuram baninge.
Rwancham za ngai lu
Karo ongam laye.
Inmaibi anu ei hungnu ngak ong ngaak rwe.
Anu mei ri ei ngai damrwe bo?
Anu riangre suithei damrwe bo?
Ei hanhung lat damrwe anu in la
Anu in ei han hunglat damrwe
Baninge anuram
Namlala anucham theinwam inku e.
Baninge
Thabaan satting phaanga
Baningsu e eina kriangnu ding namlala
Thabaan libi banuizum zum
Swakting dan.
Baning ongme
Thabaan sat thweibi
Kriangnu ding banuizum zum.
Louluro 1
Kachaak ting takungnu
Nang kapangnu makpo?
Phaango ningting nalaangna
Bathaam hung ong rwe.
Mibing langna bazaamnu lampaak pi
Hanga louro ningting kasam me.
Thirwei kanuknu hungle
Barusa bakhaamnu hungle
Braannu amlat lanu lan
Louro ningting nalang lian kataknu
Ningting cham sa kasam ongme
Inmuan kapan zai bi hanga
Louro ningting bathaam
Sumsa nu lan ding takung tu lan ro
Hungro hunglouro
Ningting nalaangna bathaam.
Lothuan sithan dan baan lune
Zukbing bing meila tulune.
Kaithouro nalan
Sum tri salanu lan
Kaisipthangro na intah.
Nakana sa kai kanei mak o
Louro ningting nalaangna han ongbi
Louro inpui om bapuba
Na om rankaan rachingma natnu
Louro ningting louro.
